محترم حضرت حکیم صاحب السلام علیکم! اللہ تعالیٰ آپ کو ہمیشہ اپنی رحمت کے سائے میں عافیت کے ساتھ رکھے ۔ آمین۔
آپ نے 16درس کا کہا تھا الحمداللہ اس کے ساتھ اور کتنے درس سن لیے حساب نہیں رہا، دل کرتا ہے ہر وقت درس سنتی رہوں۔ ساتھ یہ بھی بتاتی چلوںہمارے محلے میں بچیوں کو قرآنی تعلیم دینے کیلئے سکول ہے‘میں وہاںبچوں کو پڑھاتی ہوں وہاں پر بھی بچوں کو درس کی ہر اہم بات جتنا میرا کمزور ذہن یاد کرپاتا ہے بتاتی ہوں اور انمول خزانہ ہر بڑی بچی کو یاد کروایا ہے الحمداللہ۔ آپ کی دی ہوئی تسبیحات ہیں وہ سب اللہ کا شکر ہے ہو جاتی ہیں۔ سورئہ طارق تین بار ، رَبِّ اِنِّی مَغْلُوْبٌ فَانْتَصِرْ 313بار سورئہ کوثر 129بار روزانہ کوشش ہوتی ہے۔سورئہ مزمل گیارہ بار عشاء کے بعد ساتھ یَامُغْنِیُ 1111بار اوّل آخر درود پاک، سورئہ یٰسین‘ سورئہ رحمن فجر کے بعد، دو انمول خزانہ نمبر1 ہر نماز کے بعد صبح شام کو تین تسبیحات کسی ایک وقت میں‘ اللہ کا شکر ہے تہجد کی نماز بھی اکثر نصیب ہوتی ہے۔ چاشت کی اور اوابین تو روزانہ پڑھتی ہوں اور الحمدللہ آپ کے بیان سے دوسروں کے لیے خیر خواہی کا جذبہ سیکھ لیا ہے۔ دوسروں کے لیے رو رو کر اللہ سے مانگنے کو عادت ہوگئی ہے۔ اپنے دینی سکول کے بیت الخلاء کی صفائی کے لیے خود کومقرر کرلیا ہے۔ان کاموں سے بہت سکون ملتا ہے۔ اللہ نے میرے مسئلے بڑے آسان کردیئے ہیں۔ ایک شخص سے سخت پریشان تھی‘ بڑا سخت دل انسان تھا‘ سکول اور مسجد کے بیچ میں کھڑے ہوکر مجھے دھمکیاں دیتا تھا‘ میں حیران ہوں کہ اب مجھے بلاکر مجھ سے معافی مانگتا ہے کہ میں نے بہت غلط کیا تمہارے ساتھ اللہ نے میری آنکھیں کھول دی۔ 
میں نے کہا کوئی بات نہیں اللہ سے معافی مانگو اپنے لیے بھی اور میرے لیے بھی اللہ بڑا کریم ہے حضرت صاحب میرے پاس خواتین میں ایک ماسی آتی ہے قاعدہ پڑھنے اکثر اپنی پریشانیاں بتاکر روتی ہے۔ ایک دن میں اس کو پریشانی پر بہت روئی جمع کو آخر تین ساعت تھی دعائیں کی اس کے لیے اور اسی رات میرے لیے اللہ نے گھر کا فیصلہ کردیا سارا کچھ اللہ نے بہت آسانی کے ساتھ میسر کیا اب میں اللہ کے دیئے ہوئے نئے گھر میں ہوں اللہ کا شکر ہے بہت سہولت دی ہے اللہ نے یہاں پر میری سوچ سے بھی بڑھ کر آپ کے لیے آپ کی نسلوں کے لیے ہر نماز میں دل سے دعائیں نکلتی ہیں آپ نے اللہ کے آگے رونا، مانگنا، گرگرانا سکھا دیا۔ جزاکم اللہ خیراً۔